ཀྲུང་གོའི་བོད་ལྗོངས་དྲ་བའི་བསྒྲགས་དོན། ཟླ ༩ བའི་ཚེས ༦ ཉིན་གྱི་སྔ་དྲོར། རྒྱལ་སྲིད་སྤྱི་ཁྱབ་ཁང་གི་གསར་འགྱུར་གཞུང་སྒྲུབ་ཁང་གིས་པེ་ཅིན་དུ 《མི་རིགས་ས་ཁོངས་རང་སྐྱོང་ལམ་ལུགས་བོད་ལྗོངས་སུ་གྲུབ་འབྲས་ལྡན་པར་ལག་བསྟར་བྱས་པ》 ཞེས་པའི་དེབ་ཐེར་རྒྱབ་ཤ་དཀར་པོ （འོག་གི་དེབ་ཀྱི་བསྡུས་མིང་ལ"དེབ་ཐེར་རྒྱབ་ཤ་དཀར་པོ"ཟེར） འགྲེམས་སྤེལ་གནང་།
འགྲེམས་བསྒྲགས་ཚོགས་འདུའི་ཡུལ་དངོས། པར་ལེན་མཁན། ཧུའུ་ཆིན།
དེབ་ཐེར་རྒྱབ་ཤ་དཀར་པོར་ནང་གསེས་སུ་འགོ་བརྗོད་དང་གཞུང་དངོས། མཇུག་བསྡུ་བའི་གཏམ་བཅས་ཁག་གསུམ་དུ་དབྱེ་ཡོད་ཅིང་། སྤྱི་བསྡོམས་པས་ཡི་གེ་ཁྲི ༢ ལྷག་མཆིས། གཞུང་དངོས་ཀྱི་ཁོངས་སུ་བོད་ལྗོངས་ཀྱི་སྤྱི་ཚོགས་རྙིང་བའི་མུན་ནག་དང་རྗེས་ལུས། མདུན་སྐྱོད་འཕེལ་རྒྱས་ཀྱི་ལམ་བུར་སྐྱོད་པ། རྒྱལ་ཁབ་ཀྱི་གནས་ཚུལ་དང་འཚམ་པའི་ཆབ་སྲིད་ལམ་ལུགས། དམངས་ཀྱི་རང་ཁྱིམ་རང་བདག་ལ་ཁག་ཐེག་ཡོང་བ། དམངས་ཀྱི་བདེ་སྐྱིད་འཚོ་བ་གོང་སྤེལ། ཕུལ་བྱུང་གི་སྲོལ་རྒྱུན་རིག་གནས་སྲུང་སྐྱོབ་དང་དར་སྤེལ། ཆོས་ལུགས་དད་མོས་རང་དབང་ལ་བརྩི་འཇོག་དང་སྲུང་སྐྱོབ། སྐྱེ་ཁམས་དཔལ་ཡོན་འཛུགས་སྐྲུན་ལ་སྐུལ་འདེད་བྱེད་པ་སོགས་ཕྱོགས ༨ འདུས།
《མི་རིགས་ས་ཁོངས་རང་སྐྱོང་ལམ་ལུགས་བོད་ལྗོངས་སུ་གྲུབ་འབྲས་ལྡན་པར་ལག་བསྟར་བྱས་པ》ཞེས་པའི་དེབ་ཐེར་རྒྱབ་ཤ་དཀར་པོ། པར་ལེན་མཁན། ཧུའུ་ཆིན།
བོད་རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་རྡོ་རྗེ་ཚེ་འགྲུབ་ཀྱིས་དེབ་ཐེར་རྒྱབ་ཤ་དཀར་པོ་འགྲེམས་སྤེལ་གྱི་གསར་འགྱུར་འགྲེམས་བསྒྲགས་ཚོགས་འདུའི་སྟེང་བསྟན་དོན། དེབ་ཐེར་རྒྱབ་ཤ་དཀར་པོ་འགྲེམས་སྤེལ་བྱས་པ་ཡིས། ཀྲུང་དབྱང་གིས་བོད་ལྗོངས་དང་བོད་ལྗོངས་ཀྱི་རིགས་སོ་སོའི་མི་དམངས་ལ་ཚད་མཐོན་པོའི་མཐོང་ཆེན་དང་མཛའ་བརྩེའི་ཐུགས་ཁུར་གང་ལེགས་གནང་བ་མཚོན་ཞིང་། བོད་ལྗོངས་ཀྱི་རིགས་སོ་སོའི་མི་དམངས་ཀྱི་ཐུན་མོང་གི་རེ་འདུན་དང་སེམས་ཀྱི་སྐད་ཆ་ཚུར་སྣང་གང་ལེགས་བྱས་ཡོད། འདི་ལ་དམིགས་ནས། ངས་བོད་རང་སྐྱོང་ལྗོངས་མི་དམངས་སྲིད་གཞུང་དང་ལྗོངས་ཡོངས་ཀྱི་རིགས་སོ་སོའི་མི་དམངས ༣༠༠ ལྷག་གི་ཚབ་བྱས་ཏེ་སེམས་ཐག་གཙང་བཅད་ངང་རྒྱབ་སྐྱོར་བྱེད་རྒྱུ་དང་། སྙིང་ཐག་པ་ནས་བརྩི་བཀུར་བྱེད་རྒྱུ་ཡིན།
རྡོ་རྗེ་ཚེ་འགྲུབ་ཀྱིས་བཤད་རྒྱུར། དེབ་ཐེར་རྒྱབ་ཤ་དཀར་པོ་ཡིས་རྩོད་གླེང་མེད་པའི་དོན་དངོས་ལ་ར་སྤྲོད་ཁུངས་བཙན་གྱིས་བདེན་དཔང་བྱས་དོན། འདས་པའི་ལོ་ངོ ༥༠ རིང་། ཏང་ཀྲུང་དབྱང་གི་བློ་བརྟན་འགོ་ཁྲིད་འོག་དང་། བོད་རང་སྐྱོང་ལྗོངས་ཏང་ཨུའི་སྲིད་གཞུང་གི་མཐུན་སྒྲིལ་སྣེ་ཁྲིད་འོག མི་རིགས་ས་ཁོངས་རང་སྐྱོང་ལམ་ལུགས་ལག་བསྟར་བྱས་པ་བརྒྱུད། བོད་ལྗོངས་ཀྱིས་རྗེས་ལུས་ནས་འཕེལ་རྒྱས། དབུལ་ཕོངས་ནས་འབྱོར་ལྡན། བཀག་སྡོམ་ནས་སྒོ་འབྱེད་བཅས་ཀྱི་ལམ་བུའི་ཕྱོགས་སུ་གོམ་ཁ་བསྒྱུར་བ་དང་། སྤྱི་ཚོགས་ལམ་ལུགས་ལ་ལོ་རྒྱུས་རང་བཞིན་གྱི་ཐོལ་བརྒལ་བྱུང་ཞིང་། སྤྱི་ཚོགས་རྣམ་པར་གནམ་ས་སྒུལ་བ་ལྟ་བུའི་འགྱུར་ལྡོག་བྱུང་། མི་རིགས་ས་ཁོངས་རང་སྐྱོང་ལམ་ལུགས་ལག་བསྟར་བྱེད་རྒྱུ་ནི། བོད་ལྗོངས་ཀྱི་ལོ་རྒྱུས་གོང་འཕེལ་དང་སྤྱི་ཚོགས་ཡར་རྒྱས་ཡོང་བའི་ཕྱི་རོལ་ཡུལ་གྱི་བླང་བྱ་ཡིན་ལ། བོད་ལྗོངས་ཀྱི་རིགས་སོ་སོའི་མི་དམངས་ཀྱི་རྩ་བའི་ཁེ་ཕན་དང་འཚམ། མི་རིགས་ས་ཁོངས་རང་སྐྱོང་ལམ་ལུགས་ལག་བསྟར་བྱེད་རྒྱུ་ནི། ཀྲུང་གོའི་རྒྱལ་ཁབ་ཀྱི་གནས་ཚུལ་དང་བོད་ལྗོངས་ས་གནས་ཀྱི་དོན་དངོས་གནས་ཚུལ་དང་ཁྱོན་ཡོངས་ནས་འཚམ་སྟེ། བོད་ལྗོངས་ཡར་རྒྱས་གོང་འཕེལ་དུ་འགྲོ་བའི་གདམ་ག་ཡང་དག་ཡིན།
རྡོ་རྗེ་ཚེ་འགྲུབ་ཀྱིས་བསྟན་དོན། དེ་རིང་ནས་བཟུང་། ཏང་ཀྲུང་དབྱང་གི་བློ་བརྟན་འགོ་ཁྲིད་དང་མཛའ་བརྩེའི་ཐུགས་ཁུར། དེ་བཞིན་རྒྱལ་ཡོངས་མི་དམངས་ཀྱི་ཤུགས་ཆེན་པོའི་རོགས་སྐྱོར་འོག ང་ཚོས་ཀྲུང་དབྱང་གི་བོད་ལྗོངས་བཞུགས་མོལ་ཚོགས་འདུ་ཐེངས་དྲུག་པའི་དགོངས་དོན་ནན་གྱིས་ལག་ལེན་དོན་འཁྱོལ་བྱེད་དགོས་པ་སྟེ། མི་རིགས་ས་ཁོངས་རང་སྐྱོང་ལམ་ལུགས་རྒྱུན་འཁྱོངས་དང་། ཁྲིམས་ལྟར་བོད་སྐྱོང་བ་དང་མི་དམངས་ཕྱུག་སྒྱུར་གྱིས་བོད་ཁུལ་དར་སྤེལ་གཏོང་བ། རྒྱུན་རིང་བོར་བོད་ཁུལ་འཛུགས་སྐྲུན་བྱེད་པ། དམངས་སེམས་གོང་བུར་འགྲིལ་བ། རྨང་གཞི་སྲ་བརྟན་དུ་གཏོང་བ་བཅས་ཀྱི་གལ་ཆེའི་རྩ་དོན་རྒྱུན་འཁྱོངས་བྱེད་དགོས་ལ། རྒྱལ་ཡོངས་ཀྱི་མི་དམངས་ཡོངས་དང་ལྷན་དུ། ༢༠༢༠ ལོར་ཕྱོགས་ཡོངས་ནས་འབྱོར་འབྲིང་སྤྱི་ཚོགས་འཛུགས་སྐྲུན་བྱེད་རྒྱུའི་བྱ་གཞག་མངོན་འགྱུར་ཡོང་བ་དང་། ཀྲུང་ཧྭ་མི་རིགས་ཀྱིས་རླབས་ཆེར་བསྐྱར་གསོ་གནང་བའི་ཀྲུང་གོའི་འདུན་མ་མངོན་འགྱུར་ཡོང་ཆེད་འབད་བརྩོན་ལྷུར་ལེན་བྱེད་དགོས། དེ་ལྟར་བོད་ལྗོངས་ཀྱིས་སྔར་ལས་ལྷག་པའི་མ་འོངས་བ་བསུ་ཐུབ་ངེས།
ཁ་བྱང་ཕྱི་མོ།《མི་རིགས་ས་ཁོངས་རང་སྐྱོང་ལམ་ལུགས་བོད་ལྗོངས་སུ་གྲུབ་འབྲས་ལྡན་པར་ལག་བསྟར་བྱས་པ》ཞེས་པའི་དེབ་ཐེར་རྒྱབ་ཤ་དཀར་པོ་པེ་ཅིན་དུ་འགྲེམས་སྤེལ་གནང་།
